لأطفال مصدر فرحة و بهجة لكل اللي حواليهم، لكن تربيتهم مش دايماً بتكون سهلة على الأهل، و زي ما فيه أيام كلها حب و لعب و حنان، فيه أيام بتعدي ولا كأنها حرب! التعامل مع عناد طفلك بيكون من أصعب أنواع التربية و بيمثل تحدي حقيقي لصبر و ذكاء أهله عشان يعمل أبسط الحاجات زي أن ينام في معاد النوم أو ياكل أكله أو يرتب أوضته، وفيه أمهات كتير بتستلم قصاد عناد طفلها لكن ده بيشجعه أكتر على أنه يستمر في سلوكه، يبقى إيه هي الطريقة الصح للتعامل مع طفل عنيد ؟
- أحسن طريقة للتعامل مع الطفل العنيد هي أن توريه أن سلوكه مش بيجيب نتيجة، و أن العناد مش هيحقق ليه اللي هو عايزه ولا هيغير اللي مطلوب منه يعمله، و في نفس الوقت ركز مع سلوكه الكويس و شجعه عليه، و ده هيخليه تدريجياً يتخلى عن أسلوب العناد لأنه هيحس أن ببساطة مفيش منه فايدة.
التواصل مع طفلك مش مجرد أوامر ينفذها:
لو عايزة طفلك يسمعك لازم تتعلمي تسمعيه الأول، خصوصاً لو شخصيته قوية و بيحب يعبر عن آراءه و يتكلم عنها، و ده ممكن يخليه يعاند لما يحس أن محدش بيسمعه أو بيهتم لكلامه، و عشان كده أغلب الوقت لما بتهتمي لطفلك و تسمعي اللي حابب يقوله هتقدري تسمعي منه ايه اللي مضايقه و السبب ورا سلوكه العنيد، و أحسن طريقة هي أن تبدأي الكلام معاه بنفسك بطريقة مريحة و هادية من غير نرفزة.بدل ما تجبريه على حاجة، خليه يختار اللي حابب يعمله:
في أطفال كتير مش بيحبوا يتقالهم أوامر يعملوها، زي أن تقولي أن معاد النوم هيكون الساعة 9، أو أن اللعبة اللي هتشتروها هي اللعبة اللي أخترتيها له، الأوامر المباشرة من النوعية دي بتخلي الطفل يعاندها و يرفضها، بدل ده جربي أن تخلي عنده أختيارات، بدل ما تقوليله أن يروح ينام الساعة 9، اسأليه حابب تقرأ أنهي قصة نوم مع بعض الساعة 8، و لو فضل رافض أن يروح للسرير، قوليله بطريقة هادية أن ده مش من الأختيارات الموجودة، و خلي دايماً تكون الأختيارات أتنين أو تلاتة مش أكتر.أخلقي جو من الأحترام :
لو عايزة طفلك ينفذ طلباتك، لازم يحس أنك بتحترميه زي ما بيحترمك، متحسيسهوش أنه مجبر على سماع كلامك، فأهتمي لمشاعره و أفكاره، و خليه يكون مسؤول عن نفسه في الحاجات اللي يقدر يعملها بنفسه عشان يحس أنك واثقة فيه، و خليكي متعاونة معاه بشكل عام.
شكرا لك .. الى اللقاء
ليست هناك تعليقات: