تعلم الاقتصاد بطريقه مبسطه.
نتابع تعلم الاقتصاد بطريقه مبسطه. راجع الحلقات السابقه في مصدر ١. النهارده حنتعلم انواع الاقتصاد و تأثير ده علي المجتمع و السياسه كمان. النشاط الاقتصادي في الدنيا كلها ٤ انواع: استخراج مواد من الارض (يعني زي الزراعه و الرعي و التنجيم)، تحويل المواد من الارض لسلع تانيه (صناعه يعني)، و خدمات (زي مثلا حلاق الشعر و البياع و عامل السياحه و السمسار)، و أبحاث علميه (مصدر ٢). طيب نفهم ليه كده. النوع الاول زي الزراعه مثلا بنقول عليه نوع اولي. يعني انت بتطلع حاجه ربنا حطها في الارض و بتاخدها من غير ما تحولها لأي حاجه تانيه. يعني مثلا بتزرع و تطلع القمح او بتصطاد سمك مثلا. النوع الثاني بنقول عليه ثانوي لانك بتحول اللي طلع من الارض لحاجه تانيه (ثانويه او ثانيه). النوع الثالث و هو الخدمات مفيش فيه سلعه حقيقيه بتتباع. انت بتبيع خدمه زي حلاقه الشعر مثلا. النوع الرابع و بنقول عليه اقتصاد رابعي (او ربعاوي) و هو الأبحاث العلميه و تطوير التكنولوجيا.
ناخد مثال. حطيت بدور قطن في الارض و طلع قطن و بعت القطن. مكسبك من بيع القطن الخام هو مكسب اولي يدخل تحت النشاط الزراعي. طيب المحلج و المنسج اخد القطن و حوله لفوط و بنطلونات. ده نشاط صناعي او ثانوي. طيب الراجل اللي واقف في عمر أفندي بيبيع الفوطه القطن ده اسمه نشاط خدمي. طيب و الشركه اللي بتطور انواع جديده من البذور عشان تزود انتاج القطن ده يبقي اسمه نشاط علمي او رباعي (او حنقول ربعاوي).
امثله عمليه:
ناخد مثال كمان حيلخبطك شويه. المهندس مثلا اللي بيركب ابراج التليفون المحمول او بيصلح التليفون المحمول في مصر، ده اسمه نشاط ايه؟ حيبقي نشاط خدمي لانه ما أخدش حاجه و حولها لحاجه تانيه. هو استورد البرج و ركبه زي ما هوه. لم تحدث عمليه تحويليه او تصنيعيه. لكن المهندس اللي في امريكا و اخترع التليفون المحمول اسمه نشاط علمي (رباعي) و المهندس في الصين اللي بيشرف علي تصنيع الآي فون هناك ده اسمه نشاط تصنيعي او ثانوي. مين أكتر واحد عمل فلوس في الدوره الاقتصاديه دي كلها؟ كلهم مهندسين. واحد في امريكا اخترع. واحد في الصين صنع. و واحد في مصر ركب؟ سهله جدا. متوسط دخل المهندس في أبل هو ١٠٠ الف دولار (مصدر ٣). متوسط دخل المهندس في الصين حوالي ٧٠ الف دولار (مصدر ٤). متوسط دخل المهندس في مصر حوالي ١٢ الف دولار (مصدر ٥). واضح طبعا مين أكتر مهندس عمل فلوس. مع ان ممكن جدا ان كلهم اتعلموا نفس التعليم مثلا. لذلك دائماً نقول ان أفضل الانشطه الاقتصاديه هي: البحث العلمي ثم التصنيع ثم النشاط الخدمي.
ليه النشاط العلمي ثم الصناعي ثم الخدمي بالترتيب من حيث الدخل؟
احنا هنا في جوده بنقول ان اهم سوْال عاوزين القراء يسألوه هو ليه. ليه المهندس في امريكا بياخد مره و نص قد المهندس اللي بيصنع الآي فون في الصين اللي بياخد ٥ مرات قد المهندس اللي بيركب برج المحمول في مصر؟ ليه؟
المسأله ببساطه عرض و طلب. عمليه تصميم اي فون عمليه معقده جدا. حتي لو المهندس واخد نفس التعليم الاولي في مصر او الصين او امريكا مش حيقوم داخل مصمم اي فون علي طول. ده لازم شركه أبل تعلمه و يدخل دورات و حيعمل اخطاء و يتم تصحيحها لحد ما يقدر يصمم تليفون. عمليه بتاخد سنين. ايه اللي حصل في السنين دي؟ حصل استثمار في المهندس الامريكي. بنقول عليه رأسمال انساني او هيومان كابيتال. الاستثمار ده بملايين في كل مهندس. بعد الاستثمار ده صعب جدا ان شركه أبل تسيب المهندس ده. لازم تديله مرتب مجزي و تاخد بالها منه جدا لانه صعب تعويضه الا بضياع ملايين جديده. نفس الحكايه و ان بدرجه اقل للمهندس المشرف علي تصنيع أبل في الصين. لكن المهندس المصري اللي بيركب برج المحمول مطلوب منه بس يمشي علي التعليمات و لو مش عاجبه في ٥٠ مهندس تانيين يقدروا يعملوا نفس الوظيفه. و الموضوع لا يحتاج لا خبره و لا استثمار. و بالتالي مفيش هيومان كابيتال.
طيب واحد يقول ما الصين تحاول تاخد التكنولوجيا و تتعلم من امريكا و خلاص. و طبعا ده اللي الصين بتحاول تعمله و عشان كده امريكا بتحدد و تمنع تصدير تكنولوجيا معينه. و ده بيخلي امريكا تبان انها بتستورد كتير من الصين لكن الحقيقه انه بدون النشاط العلمي الرباعي في امريكا، الصين متقدرش تشغل مهندسين التصنيع عندها اللي بياخدوا ٧٠ الف دولار عشان يعملوا اي فون يصدروه لامريكا.
كمان نلاحظ حاجه تانيه. نشاط البحث العلمي عدد اللي بيشتغلوا فيه محدود. يعني بنتكلم عن ١٠٠-١٠٠٠ واحد عشان يعملوا التصميم. طبعا خبرات ضخمه و تكنولوجيا عاليه. لكن عدد محدود. لكن بص كده علي عشرات الآلاف في الصين اللي بيشتغلوا في تصنيع الآي فون مثلا. و ده بنقول عليه ان التصنيع بيشغل ناس كتير جدا. بينما البحث العلمي بيشغل أعداد قليله. امريكا عدد سكانها ٣٠٠ مليون. الصين عدد سكانها مليار و ٣٠٠ مليون. لذلك امريكا ممكن تركز في النشاط العلمي. الصين محتاجه تركز في النشاط الصناعي عشان تقدر تشغل الناس دي كلها.
نطبق الكلام ده علي السياحه و المولات:
احنا بنسمع كتير ان السياحه و الاستثمار العقاري و المولات امل مصر. الكلام ده مش مضبوط. السياحه و السمسره و البيع في المولات عمل خدمي ممكن يكون جزء مهم من النشاط الاقتصادي المصري. لكن مش صح يكون الوحيد. تعالوا نفهم ليه.
الدوره الاقتصاديه السياحيه فيها ايه؟ فيها أعداد كبيره من عمال النظافة و الطباخين و السفرجيه و الراقصات و الراقصين و الفواعليه اللي بيبنوا المباني. كل دول الخبرات المطلوبه منهم محدوده جدا. محدوده لدرجه انه شويه شباب و شابات من روسيا بدون تعليم حقيقي بيجوا شرم الشيخ و ياخذوا المهن دي. مفيش استثمار انساني او هيومان كابيتال. و بالتالي مرتبات الناس دي كلها محدوده جدا و لا تنمو. و بسهوله ممكن تسريحهم. سهل جدا تنزل الصعيد و تلاقي الف واحد عاوز يشتغل عامل نضافه مثلا. و الموضوع حيحتاج تدريب بالكتير أسبوع.
طبعا ده لا يقارن بعامل في مصنع بيشتغل علي مكنه انتاج. ربما يحتاج سنه عشان يتقن العمل عليها. و كل ده تدريب و استثمار في هذا العامل.
نفس الكلام مثلا في مهنه مثل سمسار العقارات او الفواعلي اللي بيبني المدن الجديده. تدريب محدود و مفيش تراكم خبرات مهم.
طبعا في السياحه في عدد محدود من المديرين و المرشدين و المروجين السياحيين اللي بياخدوا مرتبات ضخمه لان لهم خبرات مهمه. مثلا المروج السياحي في ألمانيا اللي عنده علاقات مع الشركات الالمانيه ده واحد مهم. لكن انت بتتكلم عن أعداد محدوده جدا. غير التصنيع اللي حتي العامل علي المكنه ليه اهميه و صعب الاستغناء عنه.
و طبعا فيه مالك المنشآت السياحيه و صاحب المدينه الجديده اللي اخذ الارض من الجيش ببلاش تقريبا و عمل فلوس كتير. دول طبعا اقليه قليله و عدد محدود جدا بيحققوا أرباح ضخمه نتيجه علاقاتهم مع السلطات الحاكمه.
طيب ايه المشكله في الاقتصاد الخدمي ده؟
مشكلات كتيره قوي:
١- ان العدد الأكبر من الشعب حياخد فلوس قليله جدا. في مقابل قله قليله حتعمل فلوس كبيره جدا زي الرز.
٢- ان كل العمال دول محصلش اي استثمار فيهم و لا تدريب و لا حاجه. يعني حيفضلوا علي طول زي ما هم. و احنا طبعا شايفين ان عقود من الاستثمار السياحي في مصر و في المدن الجديده و لسه بنقول الشعب مش متعلم و مش مثقف.
٣- ان العمال في الاقتصاد الخدمي دول نتيجه انهم محصلش استثمار فيهم، ممكن بسهوله الاستغناء عنهم و استبدالهم.
التالته دي هي اسوء حاجه و هي قصد مقصود. ليه؟
في أوروبا في عام ١٨٤٨ حصلت ثورات زي ثوره يناير كده هزت كل أوروبا (مصدر ٦). الجيوش الاوروبيه قمعت الثورات دي زي مصر كده. لكن بمرور الوقت أوروبا كلها بقت ديمقراطيه. ليه؟ لان ده كان وقت الثوره الصناعيه. العامل الاوروبي بقي مطلوب و حصل استثمار ضخم في تطويره عشان يقدر يشغل المكن الجديد. العامل ده بقي مثقف و متعلم و ابتدا يطالب بحقوقه. ابتدا يطلب إجازات و يطلب حقه في التصويت (أوروبا مكانش يقدر يصوت فيها الا ملاك الاراضي وقتها). و لان العامل ده صعب تغييره و استبداله، كل حكومات أوروبا استجابت للعامل الصناعي ده و أديته حقوقه.
احنا بنقول ان احد اهم أهداف استثمار الامارات و السعوديه في النشاط السياحي و الخدمي في مصر حتي من نتايج ما يطلق عليه مؤتمر مستقبل مصر(مصدر ٧) هو توجيه النشاط الاقتصادي المصري ليصبح كله خدمي و القضاء علي الصناعه المصريه حتي لا يستطيع العامل المصري المطالبه بحقوقه لانه ببساطه سهل استبداله.
هي دي خطه الامارات و السعوديه و السيسي للقضاء علي اي امل في ايه ثوره جديده في مصر. حينتج عامل سياحي خانع لاوامر السايح العربي و يعلم انه سهل استبداله لذلك يرضي بالقليل. و كما رأينا سيأخذ القليل جدا!
شكرا لك .. الى اللقاء
*
*
ليست هناك تعليقات: