من يومـين يـابـا افتكـرتك ........ لما حنيّت للي فـات
رحت جري احضن ف صورتك وسط كوم الذكريات
السنين رجعت بسيرتك ..... يوم ما قالوا : أبويا مات
إتوجع قلبي ........ و عيوني ..... دمّعوا زي العيال
سـال حنيني فجـأه مـنّي ...... حاجة فـوق الإحتمـال
ما إنت كنت الدنيــا يـابـا .. و الطيـابـه .. و الجمـال
كنت كل حيـــاة ضـنـاك
عمري ماعرفتش معاك .. إن فيـه ف الكون مُـحـال
كنت إيـدي وكنت رجـلى
كنت عيني وكنت عقلي .. و100 إجابـه ع السـؤال
كنت أخويا و كنت صاحبي .. كنت عـم وكنت خـال
كنت طفـل بـرئ حاضني .. كنت سـيد كل الرجــال
كنت إحساس السعاده
كان شـفــاف و مســامـح قلبــــــك قــوي بزيـاده
و انـا بـتـغـنـدر لجـل تـطبـطـب ... زي الـعــاده
كنت بـخــاف مـنـّـك و بحبــك ... حـب عـبــاده
كنت سفـيري ف وقـت العــــوزه و كنت المَهْــر
عمــري ماحسيت إلا ف بـُـعـدك معنى الأهـــــر
زعـــلـك مـنـّي وقـت ما تغضـب كان يوجعـنــي
إنـمـا مـــوت الأب يـا بـويــا ... قـطْمِـة ضهــــر
كنت البلســــم وقـت جراحي كنت الحل لكل مشاكلي
كنت مسايا وكنت صباحي وكنت الدنيـا أما بتضحكلي
كنت أفـرح قـوي لما يقـولوا إن انا شكلك وإنك شكلي
كنت عِـشـَّـك وانت طيري ...
كنت واخــدك خـط سيـري ...
كنت كل الناس ف عيني وف كيـاني و ف ضميري
كنت أغـير قـوي لما تحضـن حد تانى و حد غـيري
موت بـغـيـر ..
ما إنت حضنك كان كأنه ريش نعـام مفروش حـرير
كان حنـانـك مش طبيـعي كان دفــــــاك جـدا خطـير
كنت اشوفني ف نن عينك ....... لهفـة الحـلم الكبير
كنت أجمل حاجة فيا ...... كنت يـابـا حاجات كتيـر
كنت ضهري و كنت سَـنـَدي
و عــزوتـي وســـط الـــولاد
كنت لمـا تـقـــول : يا وَلَـدي
و لا حـتى تـقـــــوللي : يـاد
كنت بـجـري عليـك بسـرعه
قـبــل ما يـجـيــلـك أخـــويـا
قد إيه حنيّت ...... يا عـــالَم
إنى اقــول كلمـة : ( أبـويـا )
هيه كلمة ..
بس ليها طعم عندي بألف مكسب
قد إيه حنيت ألاعبـك وانت تخســر لجل ما اكسب
قد إيه حنيت ل حضنـك لما اكون غـايـب و جـيت
قد إيه حنيت ل شخطـك و ل عصايتـك لو إسيــت
قد إيه قـربـك وحشني ...... قد إيه بُعدك مميـــت
أيوه حنيتلك يابويا .......... و اتحنيت
آه اتحنيت .... !!!
إنت فاكر يعني موتك أمر عادي وشيئ بسيط !؟
إنت فاكر بعد منك بيتنا ده ....... يتسمى بيت !؟
دي الحاجات لو ليها صوت
كات تـنَـهْـنَــه بـالـســـنـيــن
و الحيطـــان لو كات بتنطق
كات تقـــــولـك مشتــــاقين
كات تقـــــــولـك إنـت فيـن !؟
إمتـى ترجــــع بالســـلامـه
دا انت غبـت عليـنــا يـامــا
كل يـوم بنمـوت ف بـُـعـدك
كل يـوم بـتـقــــوم قـيــامـه
ما انت خـدت الدنيـا عنـدك
و سيبت بعدك كوم يتــامـى ... !!!!
.
************
#الشاعرالعقيدمحمدهيكل
شكرا لك .. الى اللقاء
ليست هناك تعليقات: