آنا مسامحه
بقلم هناء محمود احمد
شاعرة الدقهليه
مسامحه اي حد حكم عليا وهو ميعرفنيش
مسامحه اي حد شوهني نفسيا
مسامحه اي حد اتكلم عني في ضهري
واي حد قالي كلام في وشي
وهو قاصد انه بكلامه يدبحني
او ظن فيا ظن سوء
مسامحه اي حد ظلمني وجه عليا
ووجع لي قلبي
مسامحه اي حد اتمنيت له الخير
واتمنالي الشر والآذي
مسامحه اي حد موقفش جمبي
في اكتر وقت كنت لوحدي فيه
بالرغم من علمه باحتياجي
الشديد له
مسامحه اي حد كان سبب في نزول دموعي
ولو مره
مسامحة اي حد
كان قاصد يجرحني
مسامحة اللي باعوني
واللي خانوني
واللي قتلوني وسابوني
عايشة جسد بلا روح
او بمعني اصح بقايا روح
مسامحة حتي لو اللي عمل كل ده
شخص واحد
لكنه عندي بالدنيا واللي فيها
انا مسامحة
عشان ربنا بيقول كدة
عشان ربنا يقبل اعمالنا يوم عرفة
انا مسامحة بيني وبين ربنا وربنا اعلم
لكن فيه جروح بتحتاج عشان تداوي
اننا نحط عليها كحول
وانا بعمل كدة
هستعمل الكحول دايماً
عشان اعيش
يمكن معرفش ابين اني مسامحة
لكن كفاية ربنا اعلم
تسامحوا وتحابوا
اشتروا بعض
بكلمة بفرحة بضحكة
ساعدوا بعض
ارحموا بعض
متظلموش بعض
والله الدنيا ماتسوي
اخرها في نفس بيطلع مايرجعش
خليكم ذكري كويسة
خليكم ورود لو اتقطفت عطرها يفضل باقي
احترموا بعض
اوعوا تهينوا بعض
الكلام ده ليا قبلكم
واتمني اكون زي امي الله يرحمها بالرغم من وفاتها من حوالي 29سنة الا انها ذكري جميلة باقية وعايشة
اكتر حاجة بتسعدني لما الاقي حد بيحضني ويقولي انا بحبك عشان خاطر الطيبة
ربنا يرحمك يااغلي حد في حياتي ويطيب مثواك ويجمعني بيك علي الف خير يااااااااااارب
اسفة لو طولت عليكم
بس كنت حاسة اني عاوزة افضفض واقول كدة للجميع
تراحموا وتحابوا
تسامحوا
شكرا لك .. الى اللقاء
*
*
ليست هناك تعليقات: